बार्सिलोनाको बायर्न म्युनिखसँग ८-२ को लज्जास्पद हार!!

एजेन्सी । च्याम्पियन्स लिगको क्वाटरफाइनल, अनि बायर्न म्युनिखसँग ८-२ को हार । सारा विश्व फुटबलले फाइनलअघिको फाइनल भन्दै चाख लिएर हेरेको खेलमा लज्जास्पद हार बेहोरेपछि बार्सिलोना अहिले निकै पिडामा छ ।

सन् १९४० यता टोलीले पहिलो पटक एकै खेलमा ८ गोल बेहोरेको छ । थोमस मुलरको उत्कृष्ट प्रदर्शनले प्रेरित बायर्न म्युनिखसामु बार्सिलोना निरिह जस्तै देखियो । पहिलो हाफमा नै ४-१ ले पछाडी परेको बार्सिलोनाका लागि लुइस सुआरेजले दोस्रो हाफमा गोल गर्दै स्कोर ४-२ बनाएका थिए । तर च्याम्पियन्स लिगमा गोलको खडेरी तोडेका उरुग्वेली फरवार्ड सुआरेजको उक्त गोल सान्तवनामै सिमित भयो ।

बायर्न म्युनिखको आक्रामक रणनीतिलाई बार्सिलोनाको डिफेन्सले रोक्ने कुनै अवसर नै पाएन । डिफेन्सले एकमाथि अर्को गल्ति गरिरहँदा बायर्नले प्रत्यक गल्तिको फाइदा उठायो । खेलको तेस्रो मिनेटमा नै मुलरले अग्रता दिलाएका थिए । केहिबेरमै डेविड अलावाको आत्मघाती गोलमा खेल बराबर त भयो । तर बायर्नले रोकिने कुनै संकेत दिएको थिएन ।

इभान पेरिसिचले अग्रता पुन: स्थापना गरेको केहीबेरमै सर्ज जिनाब्रीले दोब्बर अगाडि बढाए । मुलरले व्यक्तिगत दोस्रो गोल गर्दै टोलीलाई ४-१ को अग्रता दिलाए । सन् २०१५ सेप्टेम्बरयता बार्सिलोनाको लागि च्याम्पियन्स लिगमा अवे गोल गर्न नसकेका सुआरेजले खेलमा फर्कने संकेत त देखाए । तर बायर्नले आफ्नो प्रस्तुतिलाई निरन्तरता दिँदै बचेखुचेको झिनो सम्भावनामा पनि पूर्णविराम लगाइदियो ।

अल्फोन्सो डेभिसको उत्कृष्ट मुभमा जोशुआ किम्मिचले गोल गर्दै बायर्नलाई ५-१ ले अगाडि बढाए । यो अवस्था पुग्दा नै बार्सिलोनाले युरोपेली प्रतियोगितामा ५ गोल खाएको ४४ वर्ष बितिसकेको थियो । १९७६ को यूईएफए कपमा लेभ्सकी सोफियासँग ५-४ ले पराजित भएपछि बार्सिलोनाले यति कमजोर प्रदर्शन गरेको थिएन ।

बार्सिलोनाले कठिन समय समाप्त भएको सोच्न समेत सकेको थिएन की थप पिडा आउन बाँकी थियो । बार्सिलोनाबाट नै लोनमा बायर्न पुगेका फिलिपे कोउटिन्होले अन्तिम तीन गोलमा प्रत्यक्ष संलग्न हुँदै बिर्सनलायक क्षण बनाइदिए । रोबर्ट लेवान्डोस्कीको गोलमा असिस्ट दिएका उनले त्यसपछि ३ मिनेटको अन्तरमा दुई गोल गर्दै ८-२ को अविस्मरणीय जितसम्म बायर्नलाई डोर्याए ।

बार्सिलोनाले सन् १९४६ पछि पहिलो पटक एकै खेलमा ८ गोल खाएको कीर्तिमान बन्यो । यसअघि सन् १९४६ मा क्याटलान टोलीले सेभिल्लासँग कोपा डेल रेमा ८-० को हार बेहोरेको थियो । कोरोना भाइरस संक्रमणका कारण यसपटक क्वाटरफाइनल चरणदेखि एक लेगमा नै खेलको नतिजा निकालिएको हो । यससँगै बायर्न प्रतियोगिताको सेमिफाइनलमा पुगेको छ ।

च्याम्पियन्स लिगबाट बाहिरिएको बार्सिलोनाका लागि यो हारले धेरै संकेत दिएको छ । क्लब सन् २००७-०८ पछि पहिलो पटक उपाधिविहिन बनेको छ । यस खेलले बार्सिलोनाको च्याम्पियन्स लिग भविष्य त प्रष्ट पार्यी नै, समग्र सिजनमा बार्सिलोना कुन स्तरमा खेल्यो भन्ने पनि झल्को दिएको छ ।

क्लब व्यवस्थापन र खेलाडीबीच पछिल्लो समय बढेको तिक्तता अब समाधानको विकल्प छैन । खेलाडी र प्रशिक्षककै विषयमा पनि क्लबले निर्णयहरु गर्नेछ । हाललाई भने बार्सिलोनाले यो पिडाबाट उत्रन केहि समय अवश्य लिनेछ । खेलाडी मात्र नभएर प्रशिक्षक, व्यवस्थापन र समर्थकलाई यस हार बिर्सन लामो समय लाग्नेछ ।

फेसबुकबाट तपाईको प्रतिक्रिया

Close